前陣子報紙報導Ekin終於會開演唱會，仲係佢最後一個演唱會。

於是我係msn度寫十二月...要儲錢。(由於我係一個窮學生，呢d高消費活動我當然唔係隨便參加)

咁就有好多人問我十二月儲錢去邊。

咁我就如實話佢地聽啦！

大家o既反應都不外乎係...「下，鄭伊健？你鍾意o既咩？」「佢仲開演唱會？你o既taste咁特別o既咩？」

其實我想話，唔止我taste特別架，其實我一講起都有幾個人同我講話一定會去睇。

其實都係一個兒時回憶o者，當年佢係四大天王之下，都算係一個紅紅地o既歌手，形象又健康，雖然唱功就實在冇咩值得一提，但勝在d歌夠好聽，首首我唔睇都唱得番出黎架！

咁老實講，黎明唱歌好好咩？劉華唱歌又好好咩？都係時勢造英雄o者。

但係如果呢個得兩個男人，一個鄭伊健、一個黎明，我一定打死都揀鄭伊健囉！(各花入各眼嘛！我鍾意佢天性平淡)

見到鄭伊健，我會諗起：

1) 我由五年級睇蜀山奇俠開始已經鍾意佢

2) 佢o既情歌勾起初戀o既回憶

3) 一個好鬼正氣o既洪興浩南哥

4) 十年都唔變o既樣。當關禮傑已經變成阿叔時，佢依然keep得超好。

5) 一個唯一留長頭髮又唔令我覺得核突，仲覺得幾有型o既男人

6) 一個唔多爭權逐利，平平淡淡，又唔會餓死o既人

唯一最唔想諗起又會諗起o既就係Gigi Leung...

2/9

開始幫人補習，幫補生計。

我諗我由中學開始幫人私人補習，起碼有三十個學生，由幼稚園至大學我都補過。但今次係我第一次係補習社補。我o個班有十個學生，全部中一。

程度差都預o左o既，不過d態度呢，真係唔得你死。始終咁多學生一齊係比較難控制，有幾個仲聯手成日擾亂秩序。

最搞笑係有個學生同我講：「Miss，你知唔知今日七月十四呀？」我目無表情：「咁點丫？」學生：「冇...幾多鬼呀！」

大人同中學時候o既學習真係太唔同喇！我差唔多要捉住佢地隻手佢地先肯去做...最緊要係...要惡(但又唔可以太惡)！其實我早年都有諗過做老師，覺得作育英才好有意義，但我都好慶幸我當年冇選擇到，我諗實在唔係太o岩我喇！

4/9

第二次去補習，覺得慣左好多咯，起碼都壓得住班學生(不過唔做功課ｏ既始終係唔做，你都奈佢唔何）

補完習都九點幾，去ｏ左尖沙咀同個friend飲野食飯，遲來ｏ既慶祝生日。我地去ｏ左諾士佛臺ｏ既水煙bar，煲水煙、食飯、飲野，我整整一個月未飲過咁輕鬆喇！搞到點幾，我個friend突然提議去按摩，於是求其上左一間，正呀！按左兩個鐘，我個肩痛到好似唔係自己ｏ既一樣。

多謝啊！

其實最大ｏ既收穫係同你打開心扉，傾左咁多野，真係好開心！起碼，我知道，你其實對我好好，我真係感受到。我期待我ｏ既sem break~~~

前幾日咁o岩見到電視播兒歌，搞到我d童真返晒黎，其實真係好多兒歌都好好聽，而且歌詞仲有好多道理添。封面雖然係娘d，但係呢d兒歌真係長青，一聽見你自然會識哼~~~ 

個鐘的嗒跳　個鐘的嗒跳
個鐘的嗒一聲等於一秒

動作真巧妙　道理真巧妙　
仲會鐘擺兩面搖

個心卜卜跳　個心卜卜跳
每分鐘都不多不少
在賽跑之後　受到驚慌後
又會加速心跳

我想知　我想知
到底點樣整鐘錶
內裡的巧妙　內裡的巧妙
在那小小發條

個心點解跳　個心點解跳
循環現象不可少
讓血出心臟　導血返心臟
罷跳一分不得了

愛惜一分秒　愛惜一分秒
到底一分鐘等於多少
任你千千萬　任你千千萬
亦買不到多一秒

願愛惜　願愛惜
愛惜光陰惜分秒
用心的學　用心的練
競賽之中爭分秒

很記得，以前我家都有訂閱讀者文摘。

大概是我小六的時候吧！

一開始，它給我的感覺...它是一本書。

拿在手上，看看，蠻不錯嘛！有時候看看那些笑話都讓人會心微笑啊！

不知從那時開始，我媽媽不再訂閱了。

但那又如何？

它是一本像它外表一樣平淡的刊物，有就看看，沒有罷了，你不會萬分期待新一期到來。

它給人的感覺就是那樣。

以前，或許會有一群忠實的支持者。

可是，現在是什麼年代了？打開我的電腦，我可以找到的資訊還會少了？

它的版面、它整本刊物的編輯都不能夠勾起人們濃烈的興趣。

我絕對不是贊成八卦雜誌的誇張報導手法。

只是，做任何產品，不變革，不創新，就註定了被淘汰的命運。

一個月過去了。

我得到了...甚多。

完全沒想像過一個月學到的東西可以是這樣豐富。

我知道，我很喜歡現在的感覺，我會珍惜這一次。

雖然每天上學路途遙遠、課程緊密、又要暫時放棄享受人生好好省下錢來、連見朋友的時間都沒有，但我一直相信人生的旅途一定要經歷不同時刻才能豐盛人生，現在我幸運的有了這機會。

我很喜歡這校園，比起以前讀大學簡直是差天共地。山明水秀、空氣清新怡人、最重要是自成一角、藏書千萬，真是求學問的好地方。每個景點的名字起得多秀麗、多動聽，我都是現在才知道，除了神鵰俠侶有君子劍、淑女劍外，我學校竟然也有君子塔、淑女塔。

希望自己之後一直能持續這種態度吧！

多謝好朋友的支持，不只是精神上的。我會好好記住你們任何形式的幫忙。

(Ida, 壽司餐真的令我回未無窮，雖然吃後病了，但我還是過足口癮，多謝多謝！)

社交網站 Facebook方便好玩，尤其是「近況更新」一欄，只要登入就能即時與分佈各地的至親好友保持聯絡，但不少人濫用，令人厭煩……以下 12個「乞人憎」人種，有似曾相識的感覺嗎？

•事事報告型：「我起床了！」沒人想知道這些芝麻綠豆小事。
•自我宣傳型：升職、考第一，朋友自然替你高興，但請別每段更新都叫人讀你的網誌。
•搶閘報道型：「米高積遜死了！」這類人愛搶報突發消息，但也會無意中散播謠言。
•毫不保留型：由性生活細節到生痔瘡，都公諸天下。
•收集朋友型：自誇有上千個朋友。
•文法糟糕型：錯字連篇，文法不通。
•博同情型：有些人有事沒事都傷春悲秋，只為爭取注意。
•陰濕偷窺型：他們很少更新狀況或在你的頁面留言，但偶然聊天，卻對你的一舉一動竟瞭如指掌。
•瞧不過眼型：事事都看不過眼，愛罵盡天下蠢才。
•狗仔隊型：未問過當事人就把對方的照片上存發佈。
•晦澀含糊型：「要等到幾時？」「等着瞧吧。」的近況更新，叫人覺得沒頭沒腦。
•邀請成癖型：愛叫人支持這運動，簽那個請願信。

如果問我，我最憎o既係陰濕偷窺型。

呢個世界真係有好多八得好可憐o既八公八婆，唔好以為只係facebook block左佢地就會冇事。

係未有facebook之前，我將我去埃及o既相放左上一個share album，俾d friend睇，一路冇剷走佢。

點知，有一個新入職o既同事，竟然突然有一日問我：「同你去埃及o個個...邊個黎架？」我好錯愕：「你點會知我去埃及架？」同事：「我上yahoo search 你個名，咪彈晒你d野出黎囉！」

咁佢都夠膽話番我知，一個服字送俾佢！結論係，唔會同呢d人做到朋友。

有日我同屋企人搭巴士。

有一個阿婆上車，睇佢個樣都應該八十歲左右。佢一個人，好緊張咁坐ｏ係度捉到個扶手好實，睇得出佢驚會跌親。

之後，佢由紅磡開始左望右望，好似係好擔心落唔切車咁。

但最終我ｏ係土瓜灣落車時佢都未落車，佢依然好緊張咁東張西望。

我一落車，就同阿媽講：「唉，人老ｏ左真係好慘，尤其冇人照顧ｏ個ｄ，你話一個老人家點算丫？日日ｏ既生活就係擔心上唔到車、落唔到車．．．」

人生要經歷生老病死，其實真係好苦！可能佢後生時都係好活躍ｏ既，我暫時未完全想像到ｏ個種感受，我只係覺得．．．唔希望見到自己有一日係咁。

*************************************************************

有日等巴士。

見到有個阿婆推住架車仔周圍望，行來行去，唔知佢想搵咩。

於是，我問佢：「阿婆，你想搵咩呀？」

阿婆：「我要去副車站呀！」

我：「副車站？」

阿婆：「係呀，副車站！」

我：「阿婆，你搵邊度架？呢度冇副車站喎！」

（如是者，重複ｏ左五、六次)

突然我靈機一觸：「阿婆，你係咪去紅磡火車站呀？」

阿婆：「係呀，副車站呀！點去呀？」

我：「我都係去火車站，你跟我一齊上車啦！我同你一齊落。」

阿婆：「係咪架？呢架ｏ岩唔ｏ岩架？」（質疑）

我：「係架喇，到個站我同你一齊落。」

阿婆：「司機呀，呢架車係咪去副車站？」（死都唔信我）

司機：「總站唔係火車站，不過經過。」

阿婆：「下？咁我落車喇！」（恐慌）

司機：「總站唔係ｏ者，你到站咪落車囉！」（不耐煩）

阿婆：「下？」（唔明）

我：「得架喇，阿婆，我一間同你一齊落啦！」（再扮好心）

阿婆：「阿姐，係咪去副車站架？」（由於唔信我ｏ既關係，再問另一個師奶）

係冇人再理佢ｏ既情況底下，佢終於唯有唔出聲等。

係仲有兩個站就到火車站ｏ既時候，佢突然走過黎我個位大叫：「阿姐呀！到底落未架？」（我變左同師奶一樣身份，都叫做阿姐．．．）

我：「未呀，仲有兩個站，我都會落架喇．．．」

結果，我同呢個阿婆由我屋企樓下糾纏到火車站，安置埋佢去等佢個女ｏ既地方先走得到。

希望第時我變左個阿婆時都會有人咁幫我囉！

唔知係咪香港壓力太大，感覺上好似越來越多香港人精神有問題。

有一日，我落街搭車。

一落到樓下就見到個四十歲左右ｏ既女人對住條欄杆係度顛鬧，鬧ｄ廠又唔知咩咩咩，鬧個老公又唔知咩咩咩，但係見佢就著得好正常，只係拖住個行李就係咁對住空氣鬧。

通常咁ｏ既情況，我都會以比平時快，但睇落又唔多覺ｏ既步伐行開，以免佢地係唔知情ｏ既情況下傷及無辜。

點知，行到巴士站，只係半條街之隔，竟然又遇到另一名失常ｏ既女人。呢個女人都係廿幾三十歲架咋，但係就自己係度突然大笑，講一陣野，又大笑，笑得好鬼恐怖ｏ個隻。

咁我要等車嘛，冇理由行開，又唔敢望喎，望望下拎把刀仔出黎點搞先．．．

一路仲係度擔心，死啦，佢如果上我架車咁點算先？

好彩，佢上車另一架車，上ｏ既時候，都係一路狂笑，仲指住個司機笑。真係正常人都俾佢嚇一嚇。

奉勸各位： 

放鬆心情啊！有咩野都唔好鑽牛角尖，最緊要搵信得過ｏ既人去講你心裡面ｏ既感受！

離開ｏ左上環三個星期，最掛住ｏ既．．．大概係ｏ個度ｏ既食物。

其實，上環美食真係好多。

有煲仔飯、生記粥店、越南野、３蛋叉燒飯、潮州野．．．

仲有太多太多．．．

好掛住啊！一定要返去搵人食lunch！有咩辦法可以一次過食晒咁多樣野呢？

其實．．．黎ｏ左呢度之後，連麥當奴都未食過啊！

不快樂，源自對他人的要求。

我對你做了這麼多(起碼是情感上)，你給回我的...起碼未達到我想的。

每次有期待，就只會有失望。

最可憐還是我所期待的，是那樣的微不足道。

就似乎所有其他人都對我做了，而我卻傻瓜似的，目光只向著你，在希冀你能做一點點什麼。

你做了...我樂上半天。你不做了...我可以沮喪好幾天。

溝通是互動的，只有一個人不能算是溝通，大概只可以當一個自說自話的傻子。

原以為，自己對你是只求付出、不問回報的。畢竟，我還只是一個平凡不過的普通人，一個有七情六慾、貪嗔怨恨的世俗人。原諒我不能無時無刻都那麼偉大，只能提醒自己好好調節心境，明白每人性格、處境不同，體諒體諒再體諒...

只是...突發的心情低落總是難免。

或許有一天，我真的不再在乎你的時候，才能得到永恆的解脫。